政情：Pauline貓紙大細超捱轟

早前都講過立法會秘書長Pauline吳文華獻新猷，由十月復會開始，為每禮拜三大會嘅議案辯論提供參考資料，等議員發言時有「貓紙」在手，言之有物，同時我哋亦預言佢埋地雷畀自己踩，隨時捉蟲，話咁快就開口中。

民主派議員下禮拜三動議辯論，要求釋放獲諾貝爾和平獎嘅在囚內地異見分子劉曉波，秘書處尋日交畀議員嘅參考資料摘要，只有一頁紙共兩個段落，扼要敍述劉曉波上年底判刑結果，以及挪威諾貝爾評審委員會將和平獎頒畀劉曉波同埋外交部回應，全文五百字搞掂，對劉曉波入囚關鍵嘅《零八憲章》卻隻字不提。

同日秘書處亦就大會另一議案「制訂動物友善政策」提供參考資料，共四紙頁長，事件發展同相關資料都巨細無遺，連過去三年每年成功起訴涉嫌虐待動物案件宗數都搵埋。

泛民主派議員隨即炮轟秘書處「自我審查」。白鴿黨張文光質疑，秘書處見「釋放劉曉波」議案涉及政治，於是縛手縛腳，以聊勝於無嘅膚淺資料敷衍議員，要喺行管會追究。社民連陳偉業亦話秘書處呢一頁紙係對劉曉波嘅侮辱，令劉曉波「貓狗不如」，要秘書處上內會解畫。

秘書處解釋，「釋放劉曉波」議案似乎唔屬政府政策範疇，所以只能提供概括背景資料，而參考資料嘅長短亦冇規定，要視乎需要而定。唉，今次Pauline真係搬石頭砸自己腳，一於睇吓佢點拆彈。