政情：搞搞政：經濟動力蠶食富貴黨地盤

香港旅遊發展局一向係富貴黨穩守立法會功能界別議席嘅橋頭堡，對拉攏旅遊、零售及批發、飲食同交通業都具戰略功能，但尋日旅發局部分委員換人後，富貴黨呢個地盤有漸被蠶食之虞。

胡兆英任旅發局新成員

政府尋日宣布，委任旅遊業議會主席胡兆英、貿易發展局副總裁周啟良同旅行社行政總監袁麗鳳出任旅發局新成員。眾所周知，胡兆英受經濟動力力捧，加上機場管理局行政總裁許漢忠，令經濟動力喺旅發局內佔咗兩個位，勢力日漸膨脹。反之，富貴黨黨員何栢霆，連同貿發局總裁林天福同中國旅行社董事長盧瑞安，因服務滿六年「退役」卸任，富貴黨喺局內只剩下擔任主席嘅田北俊。

何栢霆之前亦係以旅議會主席身份入旅發局，依家「何出胡入」，本屬合理調動，但客觀效果就係導致富貴黨同經濟動力喺旅發局內嘅勢力出現此消彼長格局，睇嚟富貴黨要收復立法會旅遊界議席失地，未來兩年要再落多幾鞭追趕至得喇！