政情：KK魂遊立會三度甩轆
政情：KK魂遊立會三度甩轆
尋日係立法會最後一日辯論施政報告致謝議案，民協嘅KK馮檢基就致謝動議提出修訂，遺憾施政報告解決貧富懸殊無方，兼且漠視民意拒絕復建居屋，但係佢掛住講自己嘅意見，唔記得跟規矩示意動議自己嘅修訂，要立法會主席為佢代勞。
之後表決佢個修訂時，佢又失晒魂咁，冇舉手話要記名表決，或者佢覺得唔需要立法會留低白紙黑字紀錄啦，好在主席刻意放慢步伐，畀機會KK醒覺，否則大家都唔會知道邊個議員投乜嘢票。
最後表決致謝議案時，就喺主席臨宣布結果一刻，KK忽然舉手話自己投錯票，希望主席畀佢改番。KK此話一出，即時引嚟哄堂大笑，佢事後話以為跟衞生服務界代表李國麟投票就冇死，偏偏李國麟就係支持致謝議案，所以咪搞錯咗囉，好彩身邊嘅社會福利界代表張國柱提佢，否則呢次就係佢從政以嚟首次投錯票。
KK三度甩轆都冇事認真好彩。