政情：怪醫踢爆周一鑊大話精

政府喺舊年推出為期三年嘅長者醫療券試驗計劃，未等年底完成中期檢討，喺成效存疑下，早前發表嘅施政報告急不及待話加碼注資十億元。人稱「周一鑊」嘅食物及衞生局局長周一嶽，尋日喺立法會辯論施政報告致謝動議答辯嘅時候，仲口口聲聲話呢次加碼注資可用作提升長者嘅預防護理服務上。

加碼十億也徒然

周一鑊講得真係好聽，但外界一直批評長者醫療券得雞碎咁多，每年獲發五張五十蚊嘅醫療券，夾埋得二百五十蚊，用嚟睇私家醫生，睇一次夠錢畀，睇多次就要自己貼；照張Ｘ光片，可能一次就使晒，好明顯周一鑊根本係漠視民意民情。

見到周一鑊喺度自吹自擂，立法會醫學界代表「怪醫」梁家騮冇面畀，即場踢爆周一鑊講大話。怪醫話政府舊年撥出五億元搞長者醫療券計劃，但過去一年只係用咗五千六百萬元，得百分之三十二長者用過，反映計劃失敗，即使喺施政報告中再加碼十億元都係徒然。

跟住怪醫仲話，長者醫療券嘅定額資助等同於「長者出雞，政府出豉油」，一直倚靠公共醫療嘅長者根本唔會用，令有需要嘅人得唔到幫助。佢建議政府改以比例嘅方式提供資助，既可以提高使用率，又可以防止濫用，如果擔心基金不足以應付，亦可選擇性只資助啱啱正名為腦退化症嘅癡呆症、高血壓同糖尿病等老年病嘅治療。

一句講晒，怪醫係鬧爆周一鑊搵長者笨。試問依家只係用得一成多啲嘅撥款，咁少長者用肯定有問題，若果按比例計，三年試驗計劃完咗之後，都只係用到近一億七千萬元，仲有逾三億元未郁過，咁再加碼又有乜嘢用？周一鑊根本藥石亂投，假借醫療券嚟掩飾政府甚至係佢罔顧長者嘅需要。

間接造成醫生荒

此外，多名議員亦炮轟醫療政策混亂，白鴿黨主席鐵頭仁更直指政府近年推出嘅醫療保險計劃諮詢文件、促進本地醫療產業同埋協助醫護人員到內地執業等，均會導致醫生荒，但施政報告並冇提及點樣增加本地醫護人手，同埋吸引內地頂尖醫護人員來港執業。即係鬧周一鑊添煩添亂囉！