政情：阿松小伏撐小母牛訪窮村

國際小母牛香港分會主席梁錦松同太太伏明霞，日前聯同董事葉澍堃夫婦、奧運金牌得主李小鵬同畫家Carrie Chau，遠赴河北承德嘅石槽溝村同大東溝村探訪，親身體驗貧困農村生活，實地考察喺當地展開嘅扶貧項目同急需受援嘅貧困農戶，仲落手落腳幫農戶處理飼料、打穀、收割玉米，以行動呼籲大家關注內地農村貧困境況。

阿松同小伏首先去大東溝村探訪一個未受小母牛援助嘅五口家庭，阿松向小朋友送上書枱，小伏就幫女戶主收割玉米，佢哋期望呢個家庭盡快參與小母牛嘅計劃，從而有穩定收入供孩子返學，靠知識脫貧。

李小鵬就到訪受小母牛援助三年嘅石槽溝村，感受到受助家庭可以自力更生。小鵬仲親身喺斬草機處理飼料、挑牛糞去沼氣池製造沼氣燃料，實踐農村環保，佢話：「從燒柴到用天然沼氣，從草屋頂到瓦屋頂，從紙窗戶到玻璃窗戶，這些改變很實際，可以看到農戶生活改善。」