政情：發叔學精發言前先申報

行政會議成員兼立法會鄉議局功能界別議員劉皇發，早排因漏報物業買賣利益搞到一身蟻，佢尋日喺立法會辯論施政報告致謝動議上發言時終於學精，早早就申報利益話自己喺新界有土地。

發叔嘅發言內容圍繞近期最熱門嘅房屋同土地供應問題，發言之初已經聲明喺新界有土地同物業。佢話，其實本港房屋問題嘅癥結係土地供應不足，依家邊境地區其實仲有土地可以發展新市鎮；另外，鄉議局亦討論過，若果政府考慮填海嘅話，大埔吐露港會係一個好選擇，因為基於海岸線問題，吐露港係一個死海，仲可以同時處理埋高鐵工程嘅泥頭，可以話係一石二鳥。

但佢又強調，如果政府真係收地發展邊境，一定要用以地換地嘅方式，否則就係強搶民產，係違反《基本法》㗎！根據佢自己申報，佢有逾七百幅土地同物業，大部分集中喺新界地區，佢今次發言要以地換地，打埋算盤，都係同自己利益有關。