政情：田少撐場喜獲先進時計

鐘錶業老行尊孫秉樞代理星辰錶（CITIZEN）幾十年，最近決定喺太子始創中心地下開設本港首間星辰錶專門店，尋日正式開幕。孫秉樞邀得旅遊發展局主席田北俊做嘉賓，仲向田少送贈一隻價值近一萬三千蚊嘅光動能電波時計，雖然呢款錶唔及田少手上隻IWC鋼帶飛行腕錶咁名貴，但田少大讚隻錶夠實用。

呢款光動能電波時計可顯示二十六個城市嘅時間，每去到一個城市時，手錶就會接收星辰發射站嘅訊息，繼而自動調校至當地時間；錶身以鈦金屬製造，較不銹鋼質料輕四成，難怪田少戴起隻錶都驚訝好輕身，話啱晒佢戴去滑雪，最好係毋須調校時間，嚟緊農曆年就會戴呢隻錶去外地滑雪試吓。

至於點解到依家先開設專門店，孫秉樞話只係順應潮流，事關好多有名氣嘅品牌都會開設專門店，一來款式比較齊全，二來可更全面服務顧客，例如耐心解答手錶嘅科技以及設計功能問題。佢又話目前本港唔單止得中環同尖沙咀兩個旺區，其他地區亦好有消費潛力，所以喺太子開店都有得做喎！