政情：德成局長陰招懲建仔？

建仔中委會通過反對政府申辦二○二三年亞運會，負責做推銷員嘅民政事務局局長曾德成早前喺見十八區區議會正副主席時發惡，將申亞處於劣勢推落建仔主席譚耀宗身上。據聞，譚Sir喺前晚中委會再討論申亞時，嚴肅警告黨員要跟中委會決定，如果要撐申亞，事先必須跟程序申請豁免，又要大家就申亞一事封口，由佢做總發言人，明顯有意鎮壓申亞亂局，亦係一種抗衡德成局長嘅姿態。

扣起電子《清明上河圖》門票？

尋日地區突然傳出一段消息，令二人關係轉差嘅傳聞更甚囂塵上。電子動態版《清明上河圖》在港掀起撲飛熱潮，消息指建仔地區早前收到總部訊息，可獲民政局派發五千張門票，各支部於是組團參觀，做晒宣傳，點知前兩日收到回覆話不獲發門票，即刻打瀉籮蟹，焗住向旅行社洽購。貼錢荷包出血事小，民政局喺建仔反對申亞後，通知建仔不獲發門票，隨時被解讀為報復建仔，呢個政治訊息先至可大可小。

譚Sir話建仔的確向當局申請五千張團體門票，但當時已獲告知只有學校同社福機構合資格，佢哋只係姑且入紙一試，申請失敗，同申亞爭議扯唔上任何關係，又指總部從未向支部發放有免費飛嘅訊息，可能係有啲人誤會咗咁話。但佢亦彈咗兩句德成局長治下嘅民政局，話政黨都係為人民服務，點解社福機構有飛派，佢哋就冇？似乎唔係幾公道噃！

今次門票碰釘事件，究竟係咪如傳聞般咁多政治因素，外界難以證實，但就會覺得德成局長同譚Sir關係似乎愈嚟愈差。