政情：女局長聞代母走夾唔抖

恒基地產主席「四叔」李兆基嘅大仔李家傑一索得三男，震撼全城，而搵代母生BB嘅話題亦熱爆政圈，但係有個別議員同高官一聽到「代母」兩個字，就避之則吉兼快閃添！

立法會尋日開大會，咁啱見到運輸及房屋局局長Eva鄭汝樺經過，即刻捉住佢問有冇恭喜四叔呀？大家估吓身為兩女之母嘅Eva有乜反應？佢話：「咁樣都好問嘅。」跟住轉身走人。

劉江華話乜搵咁嘅嘢講

後來見到商務及經濟發展局局長Rita劉吳惠蘭，我哋向佢問咗同一個問題，佢表示冇恭喜四叔。再追問會唔會用SMS恭喜四叔呢？Rita只係一路笑而不答。

Eva同Rita嘅反應係咪有啲奇怪，好似冷淡咗啲呢？咁又難怪嘅，政府早前要增加售樓書嘅透明度，施政報告亦推出咗啲遏抑樓價嘅措施，仲話明要地產商以實用面積計算樓價，若一年內達唔成共識就會立法，尤其呢啲都要Eva同地產商周旋，若果佢對四叔添孫呢件事顯得好雀躍，又或者暴露佢同四叔幾咁熟絡，隨時會惹火上身，畀市民同政客批評佢哋係官商勾結，倒不如保持距離，咁先係明哲保身嘛！

眾所周知，身兼行政會議成員同立法會議員嘅劉江華結婚多年未有所出，但當提到「代母」時，佢講完「乜搵啲咁嘅嘢講呀？」，就走番入內廳；廠商會嘅代表林大輝仲誇張，直情當聽唔到咁快閃走入議事廳。有乜咁避忌呢？

陳淑莊等有普選先結婚

都係結婚多年冇所出嘅白鴿黨「高達」李永達，就好擔心四叔三個孫仔欠缺母愛。提到四叔派逾三千萬元利是，高達仲有啲發難咁話，呢啲唔關佢事，又唔係佢派喎！

已經有親密男朋友嘅議員陳淑莊，就話教仔女爸爸媽媽要分工，若果喺單親家庭長大嘅話，日後只有一個人扮晒黑臉同白臉，都唔知點樣教好。至於佢幾時結婚，佢話：「有普選先結婚。」竟然又喺度賣政治廣告。咁睇嚟佢起碼要等多十年，若果二○二○立法會選舉唔係佢認為嘅真普選，咁就真係唔知要等到幾時喇。