新立法年度嘅首次內務委員會同財務委員會會議尋日舉行，並選舉正副主席，不過全場毫無驚喜，因為兩個會嘅選舉過程加埋都唔夠十五分鐘，內務委員會由舊年嘅正、副主席富貴黨劉健儀（Miriam）同白鴿黨李華明連任，財委會一樣由原來嘅拍檔白鴿黨「卿姐」劉慧卿同專業會議劉秀成冧莊。
事前已有消息傳出，應該冇人出嚟爭呢幾個位，但勢估唔到議員選主席好似食生菜啫。好似選財會主席時，有議員提名卿姐連任，卿姐竟然唔記得咗示意接受提名，匆匆交畀副主席主持會議，搞到秘書小姐要開口提番佢要清楚表明自己接受提名。至於Miriam選內會主席就更加冇爭議，成個過程用咗唔使三分鐘。