本文重點
呢排股市當旺，恒指一度衝破二萬三千點，好多小股民都希望搵啲股壇明燈指吓路。民政事務局局長政治助理徐英偉未打政府工之前，曾經喺香港同加拿大唔同金融機構服務，加入政府做政助前，佢仲係恒生銀行投資事務經理添，難怪佢身邊好多朋友都當佢係股壇明燈。不過，徐英偉話，佢幫人做分析就叻，自己投資卻好麻麻，呢啲就叫明燈只照別人囉。
徐英偉話，做一個專業金融服務員，幫客人分析時一定要冷靜客觀，但自己投資時，唔多唔少一定有偏好，有時又主觀得滯，結果成績都好麻麻。
自己錢投資唔敢太勇
呢個似乎係唔少投資界人士嘅通病，可能用客戶嘅錢投資，可以好理性好客觀，又狼又狠都冇有怕；但用自己嘅錢投資，就謹慎好多，唔敢太勇。
久而久之，佢身邊嘅朋友都搵到趨吉避凶之道，即係知道佢投資乜嘢時，朋友就刻意避開佢，呢啲就叫逆向思維嘞，咁徐英偉都算係另類明燈！