內地前高官之後、聯合國兒童基金香港委員會副主席陳晴即將升格做媽咪，尋日又傳嚟好消息，佢獲委任為基金會主席，可謂雙喜臨門，真係值得恭喜，不枉佢大住個肚，都不惜長途跋涉去雲南探訪愛滋村孤兒嘅工作誠意。除咗陳晴任主席外，基金會仲委任咗吳世振、于善基為副主席，歐陽贊邦為司庫。
陳晴獲悉升任主席後好開心，佢話未來一年會同所有委員竭盡所能，為世界兒童帶嚟改變同希望，透過佢哋嘅熱誠同努力，為有需要嘅兒童改善生活。
眨吓眼，陳晴加入兒童基金會已經六年，一路做得好投入。佢家吓亦係香港海洋公園保育基金主席，舊年又獲委任為臥龍大熊貓俱樂部榮譽理事長。陳晴話過佢同熊貓好有緣，尤其認養咗大熊貓「晴晴」之後，當正晴晴係自己囡囡，連女人至愛嘅手錶、頸飾都係熊貓公仔，一見到佢自然令人聯想到熊貓。