近期為醫保頻頻曝光嘅食物及衞生局副局長梁卓偉尋晚打頭陣，同李華明合唱《沉默是金》，梁卓偉唱完仲送咗支玫瑰花畀白鴿黨副主席「卿姐」劉慧卿，真係識做。原來佢唔止指揮叻，連唱歌都唔錯。

之後登場嘅係民政事務局副局長許曉暉（Florence），佢同黃成智合唱任白金曲《劍合釵圓》，Florence唱到有表演級數，成智就有字幕都唔識唱，開頭仲要Florence唱獨腳戲，去到中段至識唱，睇嚟要惡補一下喇。

舉行黨慶嘅酒樓喺尖沙咀一個商場，咁啱華置非執董劉鳴煒喺嗰度巡視，唔知嘅仲以為佢去撐白鴿黨。