立會復會冇得早放

政府擴建堆填區嘅大計被立法會殺個措手不及後，依家嘅關鍵係政府修訂生效日期嘅決議案同議員動議廢法會否獲批，如果獲批嘅話，下禮拜三（十三號）施政報告出籠後就要喺立法會再較高下，議會中人好緊張，已經諗定應變方法。側聞一貫衝動搞事嘅社民連三子打算忍住道氣，唔喺施政報告上發火，費事畀主席趕出場，冇得喺堆填區議案上發功；其他建制快閃議員如體育界嘅霍震霆、「三點不露」李國寶都要忍，事關佢哋快閃咗，政府實會兵敗如山倒。

堆填區擴建嘅立法工作一波三折，依家好大可能排喺施政報告之後審議，由於公文袋嘅陳淑莊會動議廢法，政府尋日已經四出游說政黨支持。事前拉票外，當日嘅部署更加關鍵，尤其係功能界別議員對廢法嘅態度，更係呢場戰事嘅核心。

按照往年嘅慣例，施政報告發表之日啱啱復會，議程都唔會好激，會議應該好快結束，大部分議員都可以好快收工，今年嘅堆填區廢法卻引起全港關注，議員被迫要留堂。側聞，社民連三子打算調整策略，事關佢哋過去喺施政報告發表時，唔係嗌口號就係掟嘢，好多時都畀主席趕離場，今年佢哋就打算忍吓。點解？被主席趕走之後，跟住傾堆填區議案都冇得返嚟，所以佢哋打算忍、忍、忍。

五散人成拉票對象

建制派議員都做定工夫，一向快閃嘅霍公子、李國寶呢鋪好難即撇。不過，最新形勢顯示，立法會支持廢法嘅功能界別票數已有十三票，仲差關鍵三票，五散人成為拉票嘅對象，但「IT豪」譚偉豪、會計界陳茂波同保險界陳健波尋日表態，話未來幾日如無突破性發展，就會支持廢法，至於廠商會代表林大輝同「怪醫」梁家騮都話未有最後決定。不過淨係多三個支持，環境局局長邱騰華都已經輸硬，佢今次真係綁得呢個，綁唔到嗰個。