本文重點
仇富情緒瀰漫引起各界關注，立法會遲吓審議競爭法，內務委員會預計今日決定成立審議有關條例草案嘅競爭法法案審議委員會，並接受議員報名。公文袋議員早前揚言要爭做委員會主席，建制派方面驚被泛民主宰個會，立即策動，據講已達成撐經濟動力梁君彥（Andrew）競逐主席嘅默契。
爭競爭法審議委會主席
競爭法涉及財團壟斷同中小企營商環境等問題，內容好敏感，公文袋同社民連最肉緊，擬空群而出入委員會，白鴿黨少則兩人，多則五人，再加其他獨立泛民人士，估計大約有十三至十五人。由於委員要互選主席，人海戰術有助保住主席大位，所以經濟動力、富貴黨同專業會議等一堆同工商界關係密切嘅政團都唔敢輕敵，仲希望主導草案審議過程。
據聞，建制派為幫Andrew拿下主席之位，各政團都要「交人、交數」。
競爭法中較具爭議性內容，係貿發局應唔應豁免規管。Andrew同佢嘅「競選拉票人」林健鋒係貿發局理事，泛民一定捉住呢點嚟打，攻擊Andrew嘅商界背景有利益衝突，但建制派一樣可指摘泛民唔熟商界運作，所以口水戰肯定難分高下。