白鴿黨今晚喺尖沙咀一間新開嘅高級中菜館慶祝十六周年黨慶，自從佢哋支持政改方案後，黨嘅吸引力大增，除咗陸續收到巨額捐款外，連政府高官都唔敢怠慢佢哋，據講今晚有六名高官會聯群結隊出席活動。
不過有人贈興，自然有人攞景，一直以狙擊白鴿黨為己任嘅社民連行委「維園阿哥」任亮憲講明去踩場。任亮憲透露，佢同一班「維園行動」同「選民力量」嘅成員今晚都會去，為咗營造「踢館」效果，佢同「滷味男」錢偉洛會着功夫衫、帶一幅以毛筆寫住「民主病夫」嘅橫額，加埋一封要求同白鴿黨主席何俊仁辯論嘅挑戰書。佢話，黨慶咁好日子，鐵頭仁冇理由唔夠膽接戰，希望對方唔好逃避喎。
白鴿黨往年生日時，到賀嘅高官一向唔多，今年難得有最少六個局長答應出席，晚會都可以「升呢」，只係一眾高層要諗計應付踩場者啫。