平等機會委員會主席林煥光接咗呢個新職之後，幾度炮聲隆隆向政府，日前佢又再數政府過去幾年使咗唔少冤枉錢，仲單單打打用「與其畀人買電燈膽、派畀啲唔需要你支持嘅業主免佢差餉」嚟形容呢啲措施，斥責政府大花筒，連政府力推、行咗十年嘅強積金制度都鬧埋，批評政府忽視退休保障問題。脫離官場之後，WK真係見到不平事就可以任意起飛腳噃。
九十年代做過副教育統籌司嘅WK，日前為爭取全民退休保障聯席拍咗條宣傳片，佢話當年喺政府時，曾經力推老年退休金但無功而還，佢話政府儲埋咁多錢，過去幾年卻用得好唔合理，建議政府帶頭畀大筆墊底基金推行全民退休金仲好。佢又話，強積金保障唔到家庭主婦同低收入人士，啲中大型企業就將百分之五嘅供款變咗做最高供款，仲話如果只停留喺五加五供款，就等於「埋首落沙堆，其實係搞唔掂」。佢仲借內地嚟諷刺香港，話內地早已有退休保障計劃，本港就連九十年代想做嘅嘢到家吓都未解決，真係太遲喇。