港府日前重新包裝醫療融資計劃，以五百億元、「十大特點」利誘市民，不過，計劃一公布反應就唔多好，病人組織都批評計劃搵老襯。食物及衞生局局長周一鑊就繼續死撐，推銷計劃有呢種嗰種好處，仲將醫保計劃嘅標誌製成襟章，大小場合都見佢戴住。
心水清嘅人話，自從飛龍新標誌出咗後，周一鑊襟上經常有個飛龍襟章，日前佢就轉戴咗個淺藍色雨遮嘅襟章，呢個襟章其實係醫療保險計劃嘅標誌，食衞局做公共諮詢，亦將標誌製成宣傳品，周一鑊尋日出席電台節目及向十八區區議會正、副主席簡介醫保計劃，就戴住個襟章四圍去，但電台主持人就寸佢「落雨擔遮」。
周一鑊就話呢啲叫未雨綢繆，不過，佢撐醫保嘅行動都受到好多挑戰，聽眾連環質詢之外，連區議會主席都意見多多。