其實陳詠梅對書法同精細嘅工筆畫都有造詣，保安局副局長黎棟國太太都係佢師妹，兩師姐妹仲曾經一齊開畫展，功力毋庸置疑。甜湯咁樣幽陳詠梅一默都唔怕佢嬲，關係不言而喻。問到甜湯公開戀情後，係咪有壓力？佢又好含蓄咁話：「大家實情只係有一班識咗好多年嘅朋友，當然有啲朋友喺性情同各方面都接近啲。」唔使講，同佢最接近嗰個，肯定係陳詠梅啦！

講番呢個畫展，係大律師馬恩國為逝世廿五周年嘅畫壇名家爸爸馬家寶舉行嘅，前晚喺中環大會堂舉行，政商界唔少人士都有捧場，譬如金城營造主席王國強、協成行董事總經理方文雄、裕華國貨董事副總經理余鵬春、立法會議員林健鋒等城中名人前來賞畫。

至於方文雄就係攝影發燒友，佢話，兩個仔細個時試過畫畫送畀佢，依家再睇都好感動。仲有半年大仔就大學畢業，方文雄話會用部靚相機捕捉囝囝難忘一刻。