收番李鄭屋邨舊陣地

明年嘅區議會選舉係二○一二年立法會選舉嘅前哨戰，更係超級區議會議席參選人嘅搖籃。立法會一人黨民協最近敲定策略，計劃由元老馮檢基轉換選區、喺深水埗李鄭屋邨出選，呢一招既係肥水不流別人田，亦係安全系數較高、贏面更大嘅布局，阿基都期望呢次跳選區可以跳出彩虹，最好打得響立法會取兩席嘅如意算盤喇！

深水埗係民協老巢，部分選區更享有絕對優勢，李鄭屋邨就係其一，呢個區嘅現任議員係原民協成員官世亮，但佢年初被揭發穿櫃桶底而被革出黨，更被判監兩個半月。由於現行規定任何被判入獄三個月嘅區議員先要被「除牌」，所以坐完兩個半月監嘅官世亮未至於烏紗不保，仲喺中秋節前落番李鄭屋選區做嘢補鑊添。阿基出戰擺到明係想收番地盤，聽講佢哋已經做足準備，連banner都印埋添。

謀打破立會一席宿命

不過，消息人士話，阿基騰空嘅麗閣邨選區打算由秦寶山出戰，由於阿基上次區選只係以八十票之微撼低建仔嘅范國輝，麗閣邨個位似乎坐得唔穩，所以有人話，佢出年轉區都有怕輸之嫌，唔係純粹想扶植新人。點都好，民協都想阿基同新人同取兩個區議會席位，然後阿基再挑戰超級區議會，如果攞多一席，而民協又保住九西直選嘅一席，就更有機會喺立會取兩席，打破一人黨嘅宿命。

另外，社民連早前不斷逼迫民協同白鴿黨重申佢哋嘅泛民立場，否則要佢哋退出飯盒會同選舉協調機制。民協黨團尋日就重申該黨從冇搞過咩暗室政治，亦認為爭取民主有好多方法，該黨喺月尾將立場書通過中常委後，就會正式回信畀社民連。阿基尋日仲話，民協廿幾年嚟都強調「又傾又砌」，始終如一，如果社民連一早唔妥佢哋嘅立場，當初就唔應該同佢哋合作喎。