最近，街頭巷尾不時聽見「唔好意思」呢句港鐵宣傳口號，日前，港鐵行政總裁周松崗喺香港會外出現，彬彬有禮嘅佢言談間不經意講咗句「唔好意思」，好似呼應佢哋嘅宣傳計劃咁，唔通周總裁都有份度呢個廣告？
港鐵轄下嘅沙中線、港島南線、廣深港高速鐵路將會陸續開工，由於路線橫跨港九新界，嚟緊幾年，市民去到邊都可能見到港鐵工程嘅鑽挖同爆破工作，多多少少有啲擾民，所以港鐵最近推出一輯以「唔好意思」為主題嘅廣告，用三十幾年前嘅工程作背景，希望市民體諒今日嘅工程，同時前瞻明日嘅鐵路發展宏圖。
周總裁話，雖然依家鐵路興建技術比以前先進咗，但啲工程難免會影響市民，加上興建通風口都有反對聲音，所以佢哋先行表達歉意，仲趁機向公眾講聲「唔好意思」添。