香港珠海社團總會早前舉行成立酒會，總會前身係香港珠海聯誼會等八個鄉親社團，今次「八合一」，粵港兩地高官、名人爭相捧場。芸芸賓客中，廣東省統戰部常務副部長蔣樂儀好矚目，因為佢另一個身份係廣東省省長黃華華夫人。
蔣樂儀當晚舉止優雅淡定，手挽Chanel黑色經典菱格紋小羊皮靚袋，香肩披掛住頸巾，不經意散發住女強人嘅味道，氣質同內地女幹部好唔同。其他政商嘉賓仲有珠海市委副書記兼市長鍾世堅、市委副書記錢芳莉同市政協人大代表。身為珠海市政協委員嘅賭王四太亦喺百忙之中抽空捧場，佢話澳門毗連珠海，所以賭王喺珠海都有好多投資。問到賭王近況，四太話賭王精神好好，又鍾意周圍去歎美食，至愛幫襯利園嘅COVA。
百幾年前喺珠海發迹嘅李錦記，亦出動兩代人撐場，佢哋就係李錦記第三代傳人、集團主席李文達同埋囝囝李惠中。