潮流興玩遊戲，電視綜藝節目大行其道，有電台都借咗呢條橋嚟考吓多個政黨議員，點知喺議事廳反應敏銳嘅議員並唔擅長玩遊戲，表現當堂謝晒，一班資深議員如富貴黨主席劉健儀（Miriam）同白鴿黨劉慧卿等，對住班政黨新丁都大嘆無奈。
港台節目《議事論事》今個月開始進行新改革，搵咗五大政團各派一名新丁做客席主持，希望製造火花，尋日節目進行首場錄影，頭炮搵咗各政團嘅立法會議員同新丁一齊玩遊戲，落場玩遊戲嘅有白鴿黨卿姐、富貴黨Miriam同社民連黃毓民等。佢哋同五個新丁主持玩「有口難言」、「耳聽八方」同「單單打打」三個遊戲，反應明顯慢半拍。
最搞笑嘅係，佢哋連理解遊戲點玩都要搞好耐，但班新丁就熟晒規矩，結果有議員聽咗三次變聲綠音聲帶，都唔知同自己有關，最後聽正常版時仲要畀新丁組搶答成功，一分都攞唔到，呢次真係老貓燒鬚咯。