本文重點
西九文化區管理局行政總裁謝卓飛履新個幾月，最近終於搵到安樂窩，可以結束飄泊無定嘅生活。據悉，佢呢個安樂窩喺西九文化區附近，喺居處就可以睇到西九，唔知呢個新居擺唔擺得落佢嘅鋼琴呢？
租用酒店式住宅
謝卓飛嘅新居喺尖沙咀酒店式住宅港威豪庭，呢度位處尖沙咀，交通方便，又可以盡覽維港夜景，租金當然不菲。我哋上網查過，港威豪庭最平嘅開放式單位月租三萬六至三萬八，單房就四萬四至六萬二，一房一書房就五萬八至五萬九，兩房則八萬二至八萬八，最貴嘅就係閣樓，索價四萬二至十六萬幾。謝卓飛嘅新居到底月租幾多，就視乎佢揀幾大嘅單位嘞。
記得謝卓飛啱啱獲委任時，都呻過香港樓價貴，呢幾個月嚟，本港豪宅價格又有升冇跌，謝卓飛最後決定租用酒店式住宅，明顯係向貴樓價say no。據講，佢搵樓時先後睇過港島同九龍嘅樓盤，最後敲定呢度，目的都係鄰近西九同文化中心，方便佢出席活動或者睇展覽。