本文重點
由英皇集團主席楊受成投資嘅電影《狄仁傑之通天帝國》，尋晚喺時代廣場舉行首映禮，城中名人齊齊撐場。除咗楊受成太太夫唱婦隨外，楊受成細佬楊超成、女婿兼名導演張堅庭、教育局局長孫明揚、工聯會會長鄭耀棠，以及無綫製作資源部總監樂易玲都賞面捧場。
釣島風波成熱話
日本喺釣魚島海域扣押中國漁船船長詹其雄，引發中日外交風波，尋日日方終於釋放詹其雄，自然成為城中熱話。首映禮開始之前，眾人你一言、我一語，各抒己見。楊超成話，日方放人係好事，對於中日旅遊業都有幫助；棠哥就要求日本政府就事件道歉同作出賠償；張堅庭則認為日方放人是明智嘅做法，否則對經濟影響深遠。
講番套戲，故事係講由劉嘉玲飾演嘅武則天登基之日將近，但接二連三發生駭人嘅自焚案，死者全為武后嘅親信，武則天聽從國師指引，傳召狄仁傑查案，故事可謂曲折離奇。孫公睇到津津有味，原來佢平日好少入場睇戲，今次係因為朋友有飛，所以嚟捧場喎。