特區政府有意申辦二○二三年亞運會，日前急急開展為期六個禮拜嘅公共諮詢。不過，呢項豪擲逾四百億元嘅大計公布之後，即刻招來四方八面嘅反對聲音。官熱民冷之下，民政事務局局長曾德成尋日出席一個電台節目時只好大講投資理論，嗌市民唔好當亞運係「洪水猛獸」，因為盛事可以提升香港國際地位。德成局長將燒銀紙壯舉解作投資，真係洗腳唔抹腳嘅典範。
內地冇城市有意爭辦
德成局長尋日話，預咗社會上有人反對本港申辦亞運，但係港人應該將四百多億元開支視作推動本港體育發展嘅投資，因為舉辦亞運會有助確立香港作為亞洲世界城市嘅地位。佢仲話，其他國家申辦奧運同亞運都可以帶嚟實際效益，市民唔應該視亞運為「洪水猛獸」。佢一輪嘴講完虛無嘅好處後，又話香港今次有唔少優勢，其中一樣係佢向國家體育總局了解過，確定內地冇城市有意爭辦同一屆亞運，所以香港嘅勝算甚高。
佢雖然講到天花龍鳳，但投資論就暴露咗德成局長計數差嘅弊病。撇開當局要為舉辦亞運興建超過三百多億元嘅體育設施外，淨係營運開支都要使過百億元，但亞運嘅門票同紀念品收益就唔夠十億元，即使真係吸引到幾萬個遊客嚟，都好難收支平衡，究竟德成局長係數學差吖，定係經濟科太叻呢？咁佢嘅投資年期、回報率等又點計㗎？
百幾億補助民生好過
有網民索性教精政府，譬如攞呢百幾億元嚟同隧道公司傾回購，既可以收番隧道解決港島區日塞夜塞嘅問題，政府又可以收番部分隧道費補貼吓，何樂而不為？甚至政府可以攞啲錢嚟加快起公屋，早啲解決板間房問題。亦有網民揶揄政府，不如將長者執紙皮列為亞運項目，咁樣香港肯定包辦三甲！總之就寸爆德成局長，唔想睇住政府燒銀紙。