民協立法會議員KK馮檢基話，過去幾年已做咗多方面嘅改革，好似成立青年民協以吸收新血，並容許青年民協成員進入黨嘅核心領導層，安排佢哋接班，最重要係重新檢討黨綱內容。佢解釋，黨綱係八十年代初起草，時至今日好多地方都有需要修訂，以前佢哋黨綱比較傾向社會主義經濟，仲係寫住公屋同私樓，連居屋都冇，所以新嘅修訂會係混合經濟模式。換言之，即係要活化黨綱嘞！

至於早前傳得好熾熱嘅民協、白鴿黨合併問題，喺今次路向營唔會討論，但會回顧當前香港嘅政治環境，仲會評估一啲政治新勢力會對佢哋造成乜嘢威脅。咁又係呀，民協一貫話要走「又傾又砌」嘅路線，以依家嘅形勢，白鴿黨早前就政改方案同中央有偈傾，亦有民協份，若果要砌嘅話，民協又唔夠社民連咁激，以民協咁嘅蚊型政黨好容易被邊緣化。

雖然KK強調目前最重要係做好自己，嚟緊嘅區議會全力搏殺搶位，但喺呢次路向營，佢哋真係要諗諗重新上路，起碼要諗到條橋，令佢哋呢個蚊型政黨破網而出先得o架！