本文重點
呢排「捐身家」成為城中熱話，香江富豪唔算孤寒，福布斯富豪方潤華公子David方文雄尋日宣布成立專業組織「香江聚賢」，都被人追問係咪會捐身家。佢拍心口話，如果爸爸有意瞓身捐錢，佢冇異議，因為啲錢唔係佢嘅，但不忘補充一句：「捐錢係講心意，唔係鬥身家。」似乎暗寸外國富豪借捐錢造勢。
香江聚賢舉行首屆就職禮
香江聚賢尋日舉行首屆執委就職禮，請嚟政商界名人省招牌，行政會議召集人梁振英都有份科水，做埋榮譽贊助人。David以主席身份報喜話，會員人數已達三百人，成員嚟自港島區一班中產同工商專業人士，希望明年更旺丁，收夠一千人喎。
咁成立目的係乜？David分析話，放眼世界，營商唔易，皆因日本表現霸道，美國貿易保護主義又抬頭，要殺出血路，就要團結工商力量，返內地尋找商機，嚟緊好快會組團北上考察，總之有錢齊齊搵。
David有個超級富豪爸爸，身家超過七十億元，牽頭搵商機，優勢當然比人強。但佢謙稱唔係富豪，笑言身家都屬爸爸所有，只要老竇認為捐得開心就得。