咁會唔會從政或再就業？郭Sir兩樣都Say No，義工則除外。其實佢退休生活好充實，十二月仲會去新加坡參加馬拉松比賽，佢話凌晨五點起跑，天氣又熱又濕，好大挑戰，下禮拜一放假一有時間就會集訓。

三十幾年嚟最大嘅挑戰係九十年代管理越南船民中心，佢當時係押解組主管，若有暴亂衝突要行先，試過有幾百個船民拎住武器要衝出嚟，放催淚彈後，船民包條濕毛巾出嚟再打過。之後搜營仲攞命，船民竟偷偷由高處倒滾油滾水，佢就試過畀人掟炭爐受傷。船民有時仲打心理戰用婦孺行先，令佢最難忘。