各個政黨積極部署二○一二年嘅立法會選舉，作為全港最大型、擁有逾三十萬會員嘅老牌工會—工聯會都唔敢怠慢，雖然工聯會仲未正式發展為工黨，但喺呢次選舉唔再為建制派政黨抬轎，決定主動出擊搶位。
出選勞工界不得連任
工聯會兩個巨頭鄭耀棠同立法會黨團召集人KK黃國健，尋日喺新設嘅政務委員會「分部」表示，工聯會內部強烈要求「5+1」方案，即係五個立法會直選選區都派人出選，再搶多個新增功能界別嘅「超級區議會議席」。
要擴大政治版圖之餘，工聯會當然要保住現有兩個勞工界功能界別嘅議席，棠哥都有重申呢兩個議席不設連任機制，若果嗰個議員想冧莊做議員就要搵出路，例如轉戰地區直選或者功能界別。
呢句說話本來已經聽到慣，但今次似乎有啲刺耳。點解呢？啊！以前不嬲都淨係提及轉戰地區直選，呢次多咗嗰句「功能界別」囉！無端端放鬆原則，畀多條路出嚟揀，事有蹊蹺喎！
工聯會兩個勞工界代表葉偉明同潘佩璆都有意轉戰直選，葉偉明落新界東直選，而本身係聯合醫院精神科顧問醫生潘佩璆就打算去港島，但行情一直不被看漲，依家棠哥咁講，睇嚟係畀多條路潘醫生，等佢轉戰醫學界功能組別。若果屬實，咁潘醫生就要硬撼「五散人」之一嘅「怪醫」梁家騮。
怪醫就嚟離開「老巢」醫管局嘅公立醫院，出去掛牌私人執業，早前都被質疑可能會流失部分公院職員選票，依家潘醫生做緊公立醫院嘅顧問醫生，係咪有利搶咁啲公院票呢？潘醫Vs怪醫，呢台戲都好有睇頭㗎！
棠哥或參選超級議席
跟住記者又問工聯會係咪派人選超級議席，棠哥話外傳參選大熱陳婉嫻至今未首肯出征，工聯會已去信屬會喺十月底前舉薦人選，而佢亦唔排除披甲上陣參選超級議席。
參選超級議席，要首先成為民選區議員，棠哥唔肯透露疑似參選選區，但就話工聯會支持者「睇招牌埋位」，會長出戰超級議席，有更強凝聚力，又可帶起工聯會喺直選五區嘅氣勢咁話，總之一副磨拳擦掌嘅樣啦！