「107動力」經常示威抗議政府浪費公帑，佢哋嘅召集人何民傑早前獲邀去英國出席喺倫敦舉行嘅第七屆納稅人會議，何喺會議上數咗特區政府過去一年種種浪費公帑嘅情況，仲喺好多國家同地區代表面前提及去年引起軒然大波嘅「慳電膽風波」，最特別嘅係此行見到年近八十五歲嘅英國前首相戴卓爾夫人。
今次會議由英國納稅人聯盟舉辦，開咗三日會後，主辦單位亦喺倫敦市大會堂設宴招待與會嘉賓，並邀請曾經喺英國大力削減公共開支同減稅嘅「鐵娘子」出席，雖已垂垂老矣，但戴卓爾夫人一出場即成為風頭躉。何民傑都唔執輸，即時上前同戴卓爾夫人合照，事後仲發晒新聞稿畀本地傳媒公諸同好。
本身係區議員嘅何民傑為咗「107動力」出錢又出力，都係想出位啫，今次搵到機會同戴卓爾夫人合照，可謂不枉此行。