發財最緊要立品，房協係公營機構，取之於民，當然要用之於民，尤其係本港樓價節節上升，好多市民望樓興嘆，協助無殼蝸牛解決住屋問題，可以講係開正房協嗰瓣喇。

港府嘅房屋政策八個字講晒：頭痛醫頭、腳痛醫腳。政策亂，市場亂，人心更亂，搞到樓價好似斷線風箏咁，完全唔受控制。當局今年先後推出所謂「九招十二式」同「十四招組合拳」，可惜有如泥牛入海，無聲無息，咪講話治本，連治標都唔掂。

安居愈來愈渺茫，市民怨聲載道。港府政策失誤，房屋問題已經由民生範疇，演變成愈來愈尖銳嘅社會問題及政治問題。有人期待港府下個月發表嘅施政報告可以提供解困「良方」，不過，希望愈大，失望愈大，如果當局有良方，早就攞出嚟喇，所以咯喎，大家都係打定輸數穩陣啲。

計太一叮話齋，港府束手無策，正係房協發揮作用嘅好時機。查實，自從當局停建居屋同夾屋後，房協基本上投閒置散，無所事事，正所謂錢多好辦事，家陣房協水浸，大可以善用資源，有所作為，為小市民做啲貢獻。

房協嘅宗旨係「致力為香港市民提供可負擔嘅房屋」，角色係「照顧到私人市場及政府之間嘅空間」。講就好聽喇，但做唔做得到就唔知，其實，以房協擁有嘅資源，如果要做，一定可以發揮到積極作用。

喺香港，中上層有能力置業，低下階層可以住公屋，唯獨夾心階層處境最尷尬，高不成低不就，兩頭唔到岸。更加弊嘅係，夾心階層唔少係年輕人，做咗嘢冇幾耐，積蓄有限，仲要面對結婚生仔帶嚟嘅經濟壓力，以目前樓價水平，置業簡直係發夢。

前排最後一批夾屋貨尾單位出售場面「墟冚」，足見夾心階層對資助房屋需求有幾殷切。房協曾經表示有意興建針對中產階層嘅出租單位，等有需要人士可以先租後買，建議值得考慮，亦證明房協並唔係冇嘢可做。

話時話呀，協助市民解決住房問題，房協固然責無旁貸，但唔等於港府可以袖手旁觀。呢，最近幾次拍賣地皮，成交價一次高過一次，麵粉屢創「天價」，麵包有乜理由唔貴，無殼蝸牛又有乜理由唔驚呀？庫房水浸，港府肥到流油，如果繼續有入冇出做守財奴，民怨遲早爆燈。

咪話太一叮唔提醒，房協千祈要記住本身嘅社會責任，咪見錢眼開，唯利是圖。其實市民嘅要求好簡單，只求可以安居樂業。