本文重點
前晚喺香港工業總會前舉行成立五十周年金禧晚宴見到全國政協常委陳永棋，講開佢早前去澳洲探望寶貝女兼避暑，順便陪太太去打高爾夫球，仲笑稱佢負責幫太太執波。企喺一邊嘅食物及衞生局常任秘書長李淑儀聽到之後，好唔抵得，仲笑問佢：「幫太太執波？幫自己吖嘛？」
係李淑儀「同學」
原來棋哥同李淑儀係「同學」，佢哋曾經一齊去澳洲學打高爾夫球，講起打波自然話題不絕，仲互戴高帽添！不過棋哥好客氣咁自嘆球技麻麻，講講吓，立法會議員「IQ博士」黃宜弘咁啱行過，棋哥即刻將焦點轉移，讚IQ博士好好波，試過打出七十二桿標準桿嘅佳績，跟住話：「我啲老友就返晒嚟啦！」
原來高球圈中友流傳一句說話：「一百波，老友多！」即係打得差啲先至有朋友一齊打！聽到棋哥咁謙，IQ博士都唔敢認叻，回贈話自己嘅老友都返晒嚟，事關自從佢早前傷咗條腰之後，醫生建議佢打高球時唔好去得太盡，所以打得愈嚟愈差。