自從冇做立法會議員後，白鴿黨副主席「單雞」單仲偕更積極炒股變咗「白鴿股神」，早前都講過佢睇好台灣股市，透過買基金買入台股，依家仲話回報唔錯添，但佢點都唔肯講回報有幾多，只係話會長揸啫！
白鴿股神點解對台股咁有信心呢？單雞係香港政壇中人，睇台股走勢都拉扯到兩岸關係同台灣政局。
剛啱跟多名黨友去完台灣考察嘅單雞話，之前陳水扁在位總統時，經濟差到貼地，台股沉咗咁耐，依家可以穩步上揚嘅；再講，雖然總統馬英九畀人鬧得咁交關兼民望低嘅時候，喺嚟緊嘅市長選舉，估計國民黨嘅候選人可能輸三至四個。雖則係咁，但台灣人有一種特性，就係呢次支持某一個黨，好快又會轉軚，下次支持番啲弱勢政黨嘅候選人，所以政局唔會好亂。
政局穩定啲當然有利經濟發展，單雞話兩年後係總統選舉，以近年嚟兩岸大吹暖風，相信大陸都會撐馬英九嘅，再加上陳水扁單Case拖到依家都未判，分分鐘等到總統選舉先宣判，咁喺呢段時間內台股應該向好嘅，所以佢依家揸住啲台股點都唔放，起碼可以揸到總統選舉喎！
白鴿股神咁講，即係睇好台股未來兩年仲有得升，而佢又可以賺多啲喇！