康泰旅行社董事長黃士心嘅大仔Jason黃進達九月一日正式接棒打骰，前晚首次以董事總經理身份主持大局，喺葵青劇院為殉職領隊謝廷駿舉行追思會。Jason喺台上發言表現淡定，爸爸睇見都好滿意，大讚啱啱卸任嘅總經理劉美詩教導有方，係最佳「太傅」，即係太子師傅喎！
挾持人質慘劇對康泰衝擊好大，Jason接棒後仍有唔少善後工作要處理，前日佢趁追思會勉勵同事「放低悲傷，積極面對未來」，表現出大將風範。黃士心都滿意阿仔表現，讚佢一直沉着應戰，令公司運作順暢。
Jason臨危不亂，背後多得爸爸鋪路有功，話說Jason○三年加入康泰，事無大小都請教師傅劉美詩。旅遊業呢行突發事件特別多，拆彈講經驗，師傅正好係一本活字典。
劉美詩為康泰打江山多年，黃士心都讚賞佢有責任感，將公司搞得有聲有色。黃老闆拍心口話等劉美詩休息過後，若有意回巢，無任歡迎。