年輕人就業出路、買樓上車等等問題對政府嚟講都係燙手山芋，主要官員之前亦多次講過要同班「80後」、「90後」多啲溝通。政府嘅青少年網站尋日正式推出全新主頁，政府新聞處嘅新聞稿話今次改版完全係為咗緊貼青少年口味，同時為青少年提供更便捷嘅平台，不過個設計真係幾咁老土同失敗。
網站設計色彩都算斑斕，可惜仍然走唔出政府網站「四正」嘅設計模式，好冇吸引力。政府面對嘅青少年問題，歸根究柢就係官僚系統同時下年輕人溝通不足，冇從後生仔嘅角度出發同思考，社會先會咁多矛盾。為青少年設計網站概念雖好，但如果唔跳出框框，最後都只係得個吉！
順帶一提，新聞處嘅新聞稿將網站中其中一欄「今日熱點」寫成「今日焦點」，政府部門連想宣傳嘅網站內容都未搞清楚，試問又點吸引到外人去睇呢？