開咗學幾日，好多家長又再進入作戰狀態，為仔女嘅功課大費周章。教育局副局長Kenneth陳維安就分享教仔心得，話為人父母切忌喺子女身邊嘮嘮叨叨，十足直升機喺頭頂盤旋咁煩，只會令仔女反感，而佢都唔做直升機咁話。
Kenneth嘅大仔舊年喺名校德瑞國際學校畢業，今年升中一；八歲細仔就讀緊小學，兩個仔成績優異，聽教聽話，恨死隔籬，到底佢有乜教仔秘笈？尋日佢出席一個人才交流大會，順便講吓湊仔經。無他嘅，佢自細同囝囝講道理，話佢知父母期望係乜，潛移默化下，兩個囝囝從小就明白讀書唔懶得，放學後「自動波」溫書，唔使爸爸操心。
問起喺馬尼拉人質慘劇中生還嘅汪氏姐弟幾時復課？Kenneth話，相信兩人短期內將會重返校園，但話晒佢哋經歷重大創傷，會尊重其家人意願同聽取專家意見後再作決定喎！