好多政商界名人早前趁住放暑假同家人外遊，青年事務委員會主席Bunny陳振彬亦喺上個月拖埋太太同兩個囝囝去法國旅行，今次仲一改過往旅行模式，冇帶工人去湊仔，兩公婆一人照顧一個仔，盡情享受親子樂趣，佢話最開心係每晚同囝囝沖涼！
Bunny話法國陽光普照，一家四口喺羅浮宮對出草地Hea足兩小時，小朋友跑跑跳跳，玩得好開心，期間又登上著名嘅艾菲爾鐵塔，眺望戰神廣場公園。喺巴黎玩咗幾日後就登上塞納河遊船，而喺遊船行程中，佢被藝術之都兼古老漁港Honfleur嘅優美環境深深吸引，身兼觀塘區議會主席嘅佢，正好為鯉魚門旅遊發展取經攞靈感。
由於今次佢冇帶工人去法國，所以兩個囝囝好掛住屋企幾個工人，特登買咗幾個甜桃做手信，點知放喺背囊內焗到熟晒，部分仲壓爛咗，搞到好唔開心。難得小朋友咁有心，幾個工人安慰兩個小朋友，話冇得食都冇所謂喎！