了解規劃參觀世博

政府以高薪請番嚟嗰支「八國聯軍」副局長同政治助理，十八人相繼上任兩年，但表現劣評如潮兼屢爆醜聞，但政府最近公布中期檢討結果，竟然只係全部凍薪，變相唔使為不濟表現承擔後果，畀社會各界鬧爆，但怒潮未消之際，政府尋日宣布佢哋會組團出訪上海。

繼星期三失驚無神公布唐英年往返北京「條條fing」一日遊後，尋日傍晚又公布，指應港澳辦邀請，有十六位副局同政助喺九月五日至八日訪問上海，將與上海市有關部門進行工作交流，了解上海嘅規劃，仲會參觀上海市建設同世博。講白啲，即係使公帑遊上海。新聞稿指出，今次考察旨在加深副局政助對上海發展嘅了解，促進兩地嘅交流合作喎。

慘劇善後邊個處理

特首辦主任譚志源今次做湊仔公，擔任團長帶隊，帶住成班鴨仔遊上海。咦！十六個政治新丁訪上海，仲差兩個喎！咪就係教育局政助楊哲安同有「坡妹」之稱嘅財經事務及庫務局政助伍潔鏇。

唔通要留喺度做「門神」守住政府門口？咪咁天真喇！佢哋咁啱都係同生BB有關，楊哲安同女藝人太太張燊悅嘅第二胎就快出世，呢段日子楊哲安要陪伴在側，而坡妹幾個月前生咗第三個BB，唔方便遠行。嗱！佢哋唔係為咗公務，而係為私務唔去上海啫！

呢個副局政助上海團都幾騎呢，副局政助嘅工作同上海有幾大關係，考察行程係咪確有需要暫且唔講住，成支中下層政治任命團隊北上四日，等如集體放假遊埠，咁嘅安排，已經相當罕見。所謂：天有不測之風雲。如果嗰四日特區發生重大事情，而咁啱又有局長唔喺崗位，成班副局長離港，署任安排點處理呢？保安局副局長黎棟國同食物及衞生局副局長梁卓偉，正負責參與菲律賓人質慘劇嘅善後工作，呢個時候離港又係咪適當時機呢？

但可以肯定嘅係今次騎呢訪滬，反而被公眾清楚睇到就算副局政助全體「消失」，對政府運作唔見有實際影響，既然可有可冇，點解仲要嘥咁多錢留佢哋喺度？不如炒晒佢哋啦！