主診醫生話,茵茵現時情況十分穩定同良好,已無需任何儀器幫助呼吸,為咗令佢可以盡早投入正常生活,所以批准佢正式出院。尋日出院前,廣華醫院仲幫茵茵開咗個生日派對,同爹哋媽咪一齊切蛋糕、吹蠟燭,眼仔碌碌,手舞足蹈,真係人見人愛。大家祝願茵茵有堅強嘅意志、樂觀嘅心態、強壯嘅身體,長大後可以回饋社會。茵茵,你一定做得到!
睇見茵茵咁健康、咁快樂,好難想像佢一個月前仲喺生死邊緣掙扎。茵茵重獲新生嘅過程,簡直係一項奇迹,係一曲愛心嘅凱歌。
茵茵一出世就疾病纏身,危在旦夕。要令佢擺脫死神,就要喺氣管植入金屬支架幫助呼吸,可惜本港醫生從未為嬰兒做過呢種手術,惟有到台灣榮民總醫院求醫,但手術費要四十幾萬,非其父母可以負擔。
好在病魔無情,人間有愛,太陽報愛心基金同東方日報慈善基金及時伸出援手,登高一呼,應者雲集,讀者紛紛解囊,連唔少海外讀者亦隔洋伸出援手,善款累積超過一百八十萬元,令茵茵可以及時赴台接受手術。
所以話,茵茵喜獲重生,係港人用無數愛心創下嘅奇迹。邊個話香港人情薄過紙?正如茵茵爸爸話齋,「真係好多謝咁多善長,仲有醫生同護士,佢哋真係好好人!」
為咗繼續發揚各位善長嘅愛心,太陽報愛心基金同東方日報慈善基金扣除茵茵赴台做手術所需嘅費用後,會將今次籌得善款嘅餘額撥入兩個基金,幫助更多有需要嘅人,務求令香港人嘅愛心創造出更多奇迹。
太一叮相信,只要有愛,世界就會更美麗。就以菲律賓槍手屠殺香港人質慘劇嚟講,慘劇發生後,香港一片愁雲慘霧,但好多人喺悲憤之餘,就好似關心茵茵一樣,以各種方式對受害者及佢哋嘅家人表達愛心,伸出援手。呢,連日來有唔少團體發起募捐,有人願意收養遺孤,有人願意資助遺孤讀書,有人為受害者設立基金……香港人用自己嘅愛心展示出人性嘅光輝。
事實再一次證明,香港係一個充滿愛心、充滿溫情嘅城市,只要大家繼續發揚愛心,只要大家繼續守望相助,社會就會變得更和諧,香港明天就會更美好。