世伯醫療費獅子開大口

Cliff話，佢哋當年去馬尼拉公幹，某日喺酒店大堂等候賓客到來，世叔伯見到個賓客抵達，就急步出外迎接，但冇留意門外有兩級樓梯，於是差錯腳搞到腳部骨折。之後，呢位世叔伯被送往當地醫院，但院方竟然要收取二千美元手術費，另額外加多六千美元麻醉費，夾埋八千美元，折合港幣六萬二千四百元至肯施救。

呢筆驚人嘅醫療費，喺七十年代係天文數字，以當時嘅物價計算，幾乎買到一層樓，當地醫院嘅做法簡直係㩒住嚟搶。Cliff話，當時肉隨砧板上，惟有即刻打長途電話返香港，叫人籌錢匯過馬尼拉，咁先醫到個世叔伯。經此一事，佢對菲律賓嘅印象已經好差，今次再有咁多港人遇害，Cliff更加震驚同埋難過，甚至唔知講乜好，只有呼籲大家萬事小心。