舊年四月起出任共青團北京市委副書記嘅鄧亞萍，日前同超過三百個香港青年同三十個北京中學生對談，講到退役十三年嘅生活，佢話退役之後去咗北京清華大學讀書，一度認為自己係成績最差嘅一個，感覺好苦惱，後尾佢不斷反思同檢討，搵到一種適合自己嘅學習方法；清華畢業後，佢繼續進修，最後喺英國名牌大學劍橋大學拎埋經濟學博士學位。

佢喺活動上仲鼓勵青年人「有心唔怕遲」，最重要係及時規劃人生，之後全力向理想進發，同埋思考自己可以為國家民族同自己貢獻啲乜。