沈祖堯話，當日康泰領隊謝廷駿冒死打電話返香港報告事件，最後被拉到車門鎖上手銬，成為首個遇害港人，呢種堅守工作崗位、盡忠職守嘅行為令人欽佩；第二個係用血肉之軀擋子彈、圖阻槍手殺人嘅梁錦榮，由此亦可見父愛嘅偉大；第三個就係機智救自己一對子女，仲救埋同團另一個小朋友嘅傅太，沈校長話，傅太喺千鈞一髮之際能夠發揚推己及人嘅精神，實在難能可貴。

有沙士英雄之名嘅沈祖堯又感慨，人生嘅意義唔在於生命嘅長短，而係在於生命嘅光芒，所以佢呼籲大家要珍惜生命，仲要有臨危不亂嘅智慧、對親人嘅愛護，同埋對身邊其他人嘅關懷。