菲國特種部隊嘅拙劣表現，贏得「特蠢部隊」之名，港人對呢個隊伍嘅憤怒無以言表，有網民發揮創意，整咗隻粗口歌揶揄呢支隊伍，仲將段片擺咗上特區政府悼念菲國人質慘劇官方facebook。立法會四散人尋日上禮賓府同煲呔曾午宴，席間講施政報告之餘，據聞煲呔曾得知網頁有呢段片時，即場用手機試聽，雖然段片粗口橫飛，但啲製作都被讚夠專業。
尋日五散人中嘅四人譚偉豪、陳健波、陳茂波同梁家騮出席飯局，席間特首辦主任譚志源提起網上流傳一首Rap歌，名叫《菲特種部隊》，點擊率仲累積到二十萬人次添。煲呔曾一聽好好奇咁話：「有咁嘅事？」即刻攞出部手機上網搵片。
不過，呢首係粗口歌，席中又有特首私人秘書寗漢豪呢名女士，所以佢哋都好禮貌咁問吓佢，點知寗漢豪示意唔介意，大家於是就一齊睇片嘞。原來呢段由署名市民「阿龜」製作嘅《菲特種部隊》短片，諷刺菲國特蠢部隊禮拜一晚救人嘅拙劣表現，首歌粗口橫飛，我哋好辛苦先至搵到幾句可以見得報嘅，好似挖苦菲國軍警只識企喺度成碌木咁，又話：「你支sniper識唔識用？兇手打開個窗，你企喺度吹風……」等。
歌詞啜核，連去年初因無法忍受「長毛」梁國雄爆粗喺議事堂即場抗議而名噪官場嘅寗漢豪，都將成首粗口歌由頭聽到落尾。