原本政府擺空城計

馬尼拉人質被槍殺事件發生後，官場進入善後嘅高壓狀態。不過，最新嘅安排亦可以發現，啲高官原本趁暑假呢度去、嗰度去，照原定安排，呢個禮拜到下個禮拜初，下亞厘畢道嘅政府總部好似擺空城計咁，事關由煲呔曾數落，起碼有兩個司長、五個局長一係外訪、一係放假，總之個個離岸，慘劇發生後，佢哋梗係要取消或改變安排啦，淨係財政司司長鬍鬚曾今日訪問台灣，同政制及內地事務局局長林瑞麟率團去福建嘅行程照舊。

過去兩三個禮拜嘅政府憲報，登咗好多高官放假、署任嘅安排，尋日就反其道而行，登咗幾項勘誤，糾正晒原本嘅署任安排，政府新聞處都急急發聲明，公布煲呔曾唔去福建、唐唐唔放假，原本要署任政務司司長工作嘅教育局局長孫明揚亦唔使頂更。

處理人質事件善後工作第一線嘅保安局，局長李少光原本安排咗二十六號訪問內地同公安部門交流，事發之後，佢要即刻取消行程留港坐鎮。自從年前發生泰國包機事件後，李少光就對離港有戒心，今次咁多港人喺外地遇害，佢梗係唔肯行開啦。加埋原本去咗歐洲嘅商務及經濟發展局局長劉吳惠蘭要即刻打道回港，政府總部嘅人腳總算齊啲。

人質事件備受關注

鬍鬚曾今日會如期訪問台灣，林公公率團去咗福建。呢次林公公臨危「升呢」做福建團嘅一哥，相信連佢自己都估唔到，事關泛珠三角嘅經貿洽談會係區內最高行政官員交流嘅平台之一，過去都係最高層官員出席，林公公今次可算冷手執個熱煎堆囉。

不過，鬍鬚曾同林公公喺政府應變嘅高壓氣氛之下率團外訪，雖然可以離開壓力煲抖啖大氣，但都要更加注意自己嘅表現至得，因為人質事件備受關注，已經成為外交大事，佢哋言行都唔可以犯錯。