呢呢呢，廣東中山東升一對夫婦，前幾日被發現雙雙死喺租住嘅單位入面。警方到場勘查之後，初步推斷，丈夫持刀斬妻子至血管斷裂，因失血過多致死，然後自刎身亡。

男死者來自四川，平時靠喺車站轉賣車票維生。賣票搵兩餐，本來冇乜問題，弊在佢有鋪「買碼」癮，即係勁鍾意幫襯地下六合彩，兇案現場仲發現一份被撕爛嘅港產六合彩報《六合皇》。佢十賭九輸，經常因為輸錢而同老婆嗌大交，甚至大打出手。

叮！查實，內地近年多次發生因沉迷地下六合彩不可自拔，卒之走上不歸路嘅個案。六月初廣州白雲區就有一位本來事業有成嘅個體戶，因為中彩毒輸到傾家蕩產，導致精神失常，持槍同警方對峙並駁火，最後被擊斃。彩毒害人，真係數不勝數。

輸咗錢仲貼埋條命，地下六合彩簡直謀財害命，罪大惡極。奇就奇在，地下六合彩賭博黑點喺內地愈冚愈有、愈冚愈多。嗱，中山警方前幾日就喺南頭搗破兩個以士多做掩護嘅黑點，十幾人當堂斷正。入面有人坐莊，有人落注，同賭檔冇乜分別。更得人驚嘅係，店主仲賣埋非法六合彩報，幫客仔填埋投注單，提供賭博資訊、賭注交收「一條龍」服務。

當街開賭都夠膽死，神州早已淪陷。正所謂，擒賊先擒王，除彩禍要先搵出禍源。無數個案證明，彩禍之源，就係透過各種渠道由香港不斷非法走私入內地嘅六合彩報。

香港水警今年六月初喺大埔截獲大批準備偷運入內地嘅港產六合彩報《創富》，本報發現，《創富》連同另外兩份六合彩報《六合皇》、《貼士皇》經已靜靜雞轉咗承印人，但報刊註冊仍然維持原名。更奇嘅係，冇幾耐之後三份六合彩報刊登嘅承印人突然變番同註冊資料一樣，即係壹淫媒老闆淫賤黎擔任董事嘅一間公司。明明暗暗，兜兜轉轉，當中有乜蠱惑？無非想瞞天過海，渾水摸魚，繼續播毒嘅啫。

叮！地下六合彩禍國殃民，社會早有共識，源頭何在亦一清二楚。如果內地當局有為民除害嘅決心，剷除禍源易如反掌。但恐怖嘅現實係，當局似乎冇心除惡，淨係搵啲莊家仔開刀。

斬草唔除根，春風吹又生。家陣港產六合彩報走私無處不在，既有螞蟻搬家式走私，亦有貨運公司私下夾帶，仲有用大飛喺深圳衝關，甚至有軍車親自武裝押運添，問你服未！

計太一叮話齋，如果話冇人包庇同保護，走私港產六合彩報點會由南到北賣通街？又點會有咁多同胞不斷跳入地下六合彩賭博呢個萬劫不復嘅火坑吖？妖孽為患，神州變色，唔該執法部門唔好再縱容奸商啦！