菲律賓槍手挾持本港旅行團，最後展開大屠殺，全港好多市民都一路睇住電視直播，事後唔開心，仲有人因為太憂傷要打去紅十字會熱線求助。身兼精神科醫生嘅工聯會立法會議員潘佩璆話，心靈受咗創傷嘅市民可能出現壓力症，必須小心關注。
潘佩璆本身係聯合醫院精神科顧問醫生，日前佢趕住去更新本特區護照，以便遲啲跟立法會兩個事務委員會去日本考察，就醫療融資等問題取經。佢話，一直好留意馬尼拉慘劇嘅最新進展，除咗替枉死嘅港人不值之外，最擔心係死者親屬嘅情緒有冇得到適切照顧，因為有啲人遭逢不幸後會出現急性反應，不過創傷後壓力症其實唔一定即時顯現，可以持續成兩個星期後再出現，如果期間得唔到合適照顧，可以令情況惡化。
佢仲話，文獻上有記載，喺電視睇住慘劇直播嘅人，喺精神上其實都有機會受創；如果睇完電視持續一排覺得唔安樂，就要即時求醫喇。佢仲話好樂意幫助今次慘劇嘅死傷者家屬。