本港人質事件發生後，港府緊急應變，兩個副局長喺事件擔正大旗，一個係率領本港救援隊伍赴菲嘅保安局副局長黎棟國，另一個係統籌救治傷者、署理緊食物及衞生局局長嘅副局長梁卓偉，佢哋兩個表現盡責。港府十八名副局政助成日被外界彈人工超高、物非所值，今次總算有一次似樣嘅表現。
副局政助上任兩年表現不濟兼屢爆醜聞，政府早前公布嘅表現同薪酬中期檢討，又決定對呢十八名政治新丁一刀切凍薪，令有啲表現差劣嘅人免於被炒或減人工，各界批評聲中，黎棟國喺慘劇發生當晚臨急受命，率領多個部門人員漏夜飛往馬尼拉善後，唔止基本官方動作做齊，最令人印象深刻嘅，係佢感性一面，最經典係喺馬尼拉醫院擁抱安慰已哭成淚人、遭受丈夫及兩名女兒蒙難之痛嘅梁太。而前晚死難者家屬同靈柩運抵香港，黎棟國致辭時讚揚團友堅毅勇敢面對逆境，真情流露，一度哽咽，更贏得共鳴。
至於梁卓偉，佢上司周一嶽呢輪唔喺香港，佢由傷者返港當晚就打點醫療工作，前晚陪煲呔曾同醫管局主席胡定旭去威院探望陳國柱，尋日同肥胡去機場迎接送返香港嘅梁頌學，一宗慘劇，令兩個副局長被加分，其他副局政助真係要學嘢啦。