香港人鍾意飲奶茶，金百加集團主席黃家和（Simon）經營咖啡、紅茶生意，又出任香港咖啡紅茶協會主席，對奶茶嘅認識真係好深，佢話飲奶茶幾十年，最記掛嘅係爸爸上世紀創辦嘅上環干諾道西海安咖啡室嗰杯奶茶，嗒落最有味，加上由細飲到大，仲同班伙記感情要好，呢杯奶茶自然成為p:佢心目中嘅No.1！
海安咖啡室向來被遊客視為本港懷舊茶餐廳代表作，Simon透露，「海安」係爸爸五十年代尾創辦，七十年代轉手畀伙記，轉眼間已經幾十年。Simon間中都會返去「海安」探吓啲老伙記，例牌歎番杯少甜奶茶，再叫多件蛋撻、菠蘿油或西多士。
當年接手「海安」嘅黃城綸成七十四歲，但寶刀未老，隨手沖出靚奶茶。黃老闆話，佢沖嘅奶茶主要採用來自斯里蘭卡嘅四號茶同錦標茶，混合後再配以「黑白淡奶」，味道濃啲好味啲。問佢同Simon熟唔熟？黃老闆就話：「熟！由細睇到佢大啦，但最近一次嚟幫襯，已經係去年嘅事喇。」