哽咽捽眼力數菲國

菲律賓槍手挾持本港旅行團事件發生三日後，立法會尋日迅速召開特別保安事務委員會跟進事件，放緊暑假嘅議員好多都銷假返嚟開會。人人發言時都滿腔怒火，打頭陣嘅經濟動力林健鋒同富貴黨嘅張宇人更語音哽咽，林健鋒要停頓兩秒、抖大氣先可以繼續講嘢。工聯會嘅葉偉明同白鴿黨嘅涂謹申更好似失控咁，迹近狂怒咁狙擊保安局局長李少光，要佢以更強硬、更「好打」嘅姿態向菲律賓當局施壓，議會立場罕有一致，目的係話畀人聽，香港人唔可以咁樣畀人蝦！

尋日召開嘅會議雖然係保安事務委員會，但好多唔係呢個事務委員會嘅議員都有參加，多個黨派都借呢個機會向死難者致哀。慘劇發生冇耐，議員同港人一樣難以接受，發言時唔係聲音沙啞，就係情緒頗激動，有人更捽眼，佢哋唯一嘅共同點就係數落菲律賓政府同菲律賓警察。

林健鋒劈頭就鬧菲律賓警察當日拯救人質時好唔專業，佢講講吓已有嗚咽聲、要停低一陣先可以繼續。葉偉明更鬧菲律賓總統阿基諾三世嘅表現好差，笑騎騎回應人質被挾持事件，畀人批評嗰陣，仲話咁樣係佢表示憤怒嘅方式。李少光回應時抬出外交溝通等，惹得葉偉明更加不滿，即刻喺議事廳發脾氣，截住李少光發言、聲嘶力竭咁發難：「你係咪咁樣講嘢呀？」

瞻前顧後勢被譴責

涂謹申發言時，情緒亦愈嚟愈激動，猛鬧李少光以「冇先例」為由，無意再向菲律賓政府施加壓力、參與調查，講到後尾，阿涂語音沙啞咁話：「你繼續係咁，我真係要譴責你！」發言嘅議員大都表現激昂、憤慨，一陣要求菲律賓道歉，一陣又要抗議，講起菲律賓警隊更齊齊踩，左中右議員罕有咁立場一致，要李少光同特區政府對菲律賓強硬啲，唔好再瞻前顧後。